სოციალურ ქსელში „ტელეკომპანია პირველის“ გადაცემა „რეაქციაში“ თინა ბოკუჩავას ვიზიტიდან მონაკვეთი გავრცელდა, სადაც ტელეწამყვანი „ნაციონალური მოძრაობის“ თავმჯდომარეს მეუღლესთან, კოტე იოსელიანთან დაკავშირებით უსვამს კითხვას (დაარქივებული ვიდეო). მონაკვეთში ჟურნალისტის კითხვაზე, არის, თუ – არა რაიმე სიახლე კოტე იოსელიანის გატაცებასთან დაკავშირებით არსებულ გამოძიებაზე, პასუხად ისმის თინა ბოკუჩავას შემდეგი ფრაზა: „მე გამომძიებელს, რომელმაც დამირეკა ჩემს პირად ტელეფონზე ვუთხარი, რომ მივდიოდი ორშაბათს ბრიუსელში იმიტომ, რომ ბრიუსელში უნდა დავსწრებოდი ძალიან მნიშვნელოვან, წინასწარ დაგეგმილ ბრიუსელის ფორუმს და, სხვათა შორის, არ ვიცი რამდენად მომეცემა შესაძლებლობა, მაგრამ იქ მქონდა ძალიან მნიშვნელოვანი შეხვედრები, მათ შორის, ხანგრძლივად ვესაუბრე ბენჟამინ ჰადადს, რომელიც არის პრეზიდენტ მაკრონთან დაახლოებული პირი და მისი მინისტრი ევროპის საკითხებში და მინდა გითხრათ, რომ საქართველოზე ერთ-ერთი ყველაზე საკვანძო პირია ევროპაში, მე ვიტყოდი. ასევე საუბრის შესაძლებლობა მქონდა კაია კალასთან ევროკომისიის საგარეო წარმომადგენელთან და ვიცე პრეზიდენტთან. ამაზე იმედი მაქვს მექნება საუბრის შესაძლებლობა“.
ვიდეოს თან ახლავს აღწერა „მომენტი, როცა კოტე არავის ახსოვს“. აღწერა ვიდეოსთან ერთად ქმნის შთაბეჭდილებას, რომ თინათინ ბოკუჩავამ თავი აარიდა მისი ქმრის სავარაუდო გატაცების საქმესთან დაკავშირებით დასმულ კითხვას და ამის ნაცვლად ევროპაში მის უკანასკნელ ვიზიტზე ისაუბრა.
სინამდვილეში, ვიდეოს შინაარსი მანიპულირებულია, რაც ინტერვიუდან შერჩევითი მონაკვეთების გაერთიანების შედეგადაა მიღებული.
მართალია ბოკუჩავამ ეს სიტყვები ნამდვილად წარმოთქვა, თუმცა ეს მისი ქმრის საქმესთან დაკავშირებული უფრო ფართო ახსნის ნაწილი იყო და არა მისი პასუხის ცენტრალური აქცენტი.
ვრცელ ინტერვიუში (10:10 წუთიდან) თინათინ ბოკუჩავამ განაცხადა: „6 ივნისს ორივეს დაგვირეკეს მეც და კოტესაც თბილისის პოლიციის დეპარტამენტიდან და მოითხოვეს ჩვენი გამოკითხვა, რაზეც ბუნებრივია, ჩვენ ვთქვით უარი და მოვითხოვეთ მაგისტრი მოსამართლე არა იმიტომ, რომ იმ სასამართლოს იმედი გვაქვს, რომელიც ჟურნალისტებს Facebook- პოსტების გამო აჯარიმებს და უდანაშაუალო ადამიანებს აპატიმრებს, არამედ იმიტომ, რომ რაღაცა პროცედურულად მაინც ოდნავ უფრო წესით და კონსტიტუციით დამოუკიდებელი ორგანო მოგვეთხოვა, როგორც გამოკითხვის ფორმალური ადგილი. ეს მოხდა 6 ივნისს. მე იმ გამომძიებელს, რომელმაც დამირეკა, რომელიც დამიკავშირდა ჩემს პირად ტელეფონზე ვუთხარი, რომ მივდიოდი ორშაბათს ბრიუსელში…
[საუბრობს იმ ნაწილს, რომელიც Facebook-ვიდეოშია ნაჩვენები]ამ გამომძიებელს მოკლედ ვუთხარი, რომ ეს დიდი ხნის წინ დაგეგმილი ვიზიტი იყო, რომელსაც ვერ გადავდებდი, მაგრამ ასევე ვუთხარი, რომ ვბრუნდებოდი 13-ში გამთენიას და მეგონა, რომ 13-ში დამიბარებდნენ. და ეს იყო პარასკევი. პარასკევს არ დამიბარეს, არც ორშაბათს, არც სამშაბათს, არც ოთხშაბათს და დღეს არის ხუთშაბათი. სავარაუდოდ, იმიტომ, რომ მათ თავად სურთ ახლა საქმის მიჩქმალვა და მიმალვა იმიტომ, რომ ყველაფერი ხელის გულზე დევს. და მე ახლა არ მივცემ მაინც ჩემს თავს იმის უფლება, რომ პირველად ის ინფორმაცია, რომლის გაჟღერებაც მსურს, რაც მე ვფიქრობ, რომ მნიშვნელოვანი იქნება გამოძიებისთვის გავაჟღერო მედიით და არა გამოკითხვაზე, მაგრამ ჩვენც გვაქვს რაღაც დამატებითი ინფორმაცია, რომელიც ჩემი აზრით, საყურადღებო უნდა იყოს ნებისმიერი მოსამართლისთვის“.
ამის შემდეგ თინა ბოკუჩავამ ოდნავ უფრო ფართოდ ისაუბრა იმ მასალაზე, რომელიც მას ჰქონდა და რომელიც, მისი განცხადებით, „ადასტურებს იმას, რომ სურვილის შემთხვევაში ზუსტად 10 წუთში შეუძლიათ ამ საქმის გახსნა“. ამდენად, ის წარმოდგენა, რომელსაც მანიპულირებული ვიდეო ქმნის, რომ თინა ბოკუჩავა მისი ქმრის სავარაუდო გატაცებაზე საუბრის ნაცვლად ევროპაში გამართულ ვიზიტზე ისაუბრა, მცდარია. ბოკუჩავას ინტერვიუს სრულ ვერსია ადასტურებს, რომ მან ვრცლად ისაუბრა კოტე იოსელიანთან დაკავშირებით.
ცნობისთვის, 8 ივნისს კოტე იოსელიანმა გამოაქვეყნა ვიდეო, სადაც საჯაროდ ბოდიშს იხდიდა მის მიერ უტა ივანიშვილთან დაკავშირებით რამდენიმე წლის წინ გაკეთებული კომენტარის გამო. მომდევნო დღეს, 9 ივნისს, თინათინ ბოკუჩავამ გამოაქვეყნა ვიდეო, სადაც განაცხადა, რომ მის მეუღლე საცხოვრებელი სადარბაზოს მიმდებარე ტერიტორიიდან ხუთმა ნიღბიანმა გაიტაცა და მასზე ზეწოლას შვილების უსაფრთხოებით ახდენდნენ. თინათინ ბოკუჩავას განცხადებით, ეს ფაქტი მისი დაშინებისა და გაჩუმებისკენ იყო მიმართული.
