სოციალურ ქსელში Facebook-გვერდი Magniti • მაგნიტი თაღლითურ პოსტს ავრცელებს. პოსტის აღწერის თანახმად: „ჯერჯერობით ვერავინ იპოვა 694-ის გარდა სხვა ნომერი. გამარჯვებულები ჯერ არ გამოვლენილა. მათ, ვინც ამ ღონისძიებაში მონაწილეობს, აქვთ შანსი მოიგონ 2025 წლის Volkswagen Tiguan R-Line ავტომობილიდან ერთ-ერთი. წარმატებებს გისურვებთ“. რეალურად, პოსტი სუპერმარკეტების ქსელ „მაგნიტს“ არ ეკუთვნის და სავარაუდოდ, თაღლითური სქემის ნაწილია (არქივირებული ბმული).
საგულისხმოა, რომ ამავე გვერდს მსგავსი შინაარსის კიდევ რამდენიმე პოსტი აქვს გამოქვეყნებული (1; 2).
საინტერესოა, გამოქვეყნებული თაღლითური პოსტის რამდენიმე დეტალი, რაც მის არასანდოობაზე მიუთითებს. პირველ რიგში, გვერდი, რომელიც ამ პოსტს აქვეყნებს 2024 წლის 11 დეკემბერს შეიქმნა, თუმცა მხოლოდ სამი პოსტი აქვს გამოქვეყნებული – სამივე გათამაშებასთან დაკავშირებით. გვერდი, სავარაუდოდ, სწორედ ამ თაღლითური სქემის გასავრცელებლად შეიქმნა. 2025 წლის 4 ნოემბრის მონაცემით, გვერდს 1700 გამომწერი ჰყავს. სექციაში „ინფორმაცია“ გვერდს არ აქვს მითითებული საკონტაქტო ან სხვა სახის ინფორმაცია, რაც მის სანდოობაში დაგვარწმუნებდა.
ამასთანავე, სუპერმარკეტების ქსელი „მაგნიტის“ რეალური Facebook-გვერდის სახელი განსხვავებული შრიფტითაა დაწერილი. გარდა ამისა, რეალურ გვერდს დეტალურად აქვს მითითებული საკონტაქტო და სხვა სახის ინფორმაცია. ნამდვილ გვერდზე ყოველდღიურად ქვეყნდება სხვადასხვა შინაარსის პოსტი, სიახლეების, აქციებისა თუ სუპერმარკეტთან დაკავშირებული სხვა საკითხების შესახებ. „მაგნიტის“ ნამდვილ Facebook-გვერდს 2025 წლის 4 ნოემბრის მონაცემით, 328 ათასი გამომწერი ჰყავს.
საგულისხმოა, რომ „მაგნიტის“ ოფიციალურ გვერდზე ხშირად ეხმიანებიან სოციალურ ქსელში გავრცელებულ თაღლითურ პოსტებს (1; 2). მაგალითად, ბოლოს „მაგნიტის“ Facebook- გვერდზე 2025 წლის 19 ოქტომბერს გამოქვეყნდა პოსტი, სადაც სუპერმარკეტი აცხადებდა, რომ ბოლო დროს მათი სახელით ბევრი ყალბი გვერდი იქმნება.
ამგვარად, სუპერმარკეტების ქსელი „მაგნიტის“ სახელით გავრცელებული ინფორმაცია რეალობას არ შეესაბამება. პოსტი თაღლითური სქემის ნაწილია და სავარაუდოდ, Facebook-მომხმარებლების პირადი ინფორმაციისა თუ საკრედიტო ბარათის მონაცემების მოპოვებას ისახავს მიზნად. საგულისხმოა, რომ „ჯეოფაქტსს“ მსგავსი შინაარსის პოსტები წარსულშიც გადაუმოწმებია (1; 2).
