სოციალურ ქსელში Facebook-ანგარიში უკრაინის პრეზიდენტის ვიდეოს ავრცელებს (დაარქივებული ბმული). ვიდეოში ზელენსკი ამბობს: „გპირდებით, მომავალ წელს ყირიმს დავიბრუნებთ, რა თქმა უნდა, მე ამის არ მჯერა, მაგრამ, როგორც პრეზიდენტი, ვალდებული ვარ, თქვენში ჩავნერგო ნდობა, რწმენა ხვალინდელი დღის მიმართ”.
სინამდვილეში, მონაკვეთი 2014 წლის 31 დეკემბრით დათარიღებული კომედიური სკეტჩიდან არის აღებული, რომელშიც ზელენსკი უკრაინის მაშინდელ პრეზიდენტ პეტრო პოროშენკოს პაროდიას აკეთებს. აღნიშნული კონტექსტის გარეშე, ვიდეოს მომხმარებელი შეცდომაში შეჰყავს და აფიქრებინებს, რომ მასში ვოლოდიმირ ზელენსკი ყირიმთან დაკავშირებით საკუთარ პოზიციას გამოხატავს.
ზელენსკი უკრაინის პრეზიდენტი 2019 წელს გახდა. მანამდე კი პოპულარული შოუმენი, კომიკოსი, რეჟისორი, პროდიუსერი და სცენარისტი იყო. სკოლაში სწავლის პერიოდში ის და მისი მეგობრები შეუერთდნენ ადგილობრივ „კავეენს“ (Klub Vesyólykh i Nakhódchivykh), რომელიც 1960-იანი წლებიდან პოსტსაბჭოთა სივრცეში პოპულარული კომედიურ შეჯიბრებას და სატელევიზიო შოუს წარმოადგენს. 2005 წლიდან ზელენსკი რამდენიმე ფილმში მონაწილეობდა, თუმცა მისი ყველაზე ცნობილი როლი სერიალში „ხალხის მსახური“ გახლდათ. სერიალში მან სკოლის მასწავლებლის როლი შეასრულა, რომელიც მოულოდნელად პრეზიდენტი გახდა. ამ შოუს სახელი მოგვიანებით მისი პოლიტიკური პარტიის სახელწოდებად აირჩიეს.
მანამდე, 2005 წელს ზელენსკიმ შექმნა სტუდია „კვარტალ-95“-ის და მისი სამხატვრო ხელმძღვანელი გახდა. Facebook-ანგარიშის მიერ გავრცელებული ვიდეო სწორედ „კვარტალ-95“ კომედიურ სკეჩს წარმოადგენს. ვიდეო YouTube პლატფორმაზე „კვარტალ-95“-ის მიერ 2014 წლის 31 დეკემბერს გამოქვეყნდა. სკეჩში ზელენსკი პეტრო პოროშენკოს, უკრაინის მაშინდელი პრეზიდენტის (2014-2019 წწ), პაროდიას აკეთებს.
შესაბამისად, ვიდეოს გავრცელებას, დამატებითი კონტექსტის გარეშე, მომხმარებელი შეცდომაში შეჰყავს და აფიქრებინებს, რომ მასში ყირიმთან დაკავშირებით ზელენსკი საკუთარ პოზიციას აფიქსირებს.
