სოციალურ ქსელში გავრცელებული ვიდეოს თანახმად, თბილისში არაბმა მამაკაცმა საკუთარი მისამართი არაბული წარწერით ჩაანაცვლა (დაარქივებული ბმული). სინამდვილეში, გავრცელებული ვიდეო არა თბილისში, არამედ თეირანშია გადაღებული.
ვიდეო 7 იანვარს ბრიტანეთში დაფუძნებულმა საინფორმაციო ქსელმა „Iran International” გამოაქვეყნა. მედიის თანახმად, ვიდეოში ჩანს მამაკაცი, რომელიც თეირანში სიმბოლურად ერთ-ერთი ქუჩის სახელს დონალდ ტრამპის ქუჩის სახელით ცვლის. ვიდეო იმავე აღწერით ამერიკული მედიის „New York Post“-ის ვებგვერდზეც გავრცელდა (იხილეთ ფოტო მარჯვნივ).
ვიდეოს მოახლოებისას ჩანს, რომ ბანერზე, რომელსაც აღნიშნული პირი კედელზე ამაგრებს სპარსულად ტრამპი (ترامپ), ხოლო მის ქვემოთ ლათინურად პრეზიდენტი ტრამპი აწერია (იხილეთ კადრი ვიდეოდან).
ამდენად, სოციალურ ქსელში აღნიშნული ვიდეო მცდარი აღწერით ვრცელდება, ის არა თბილისში, არამედ თეირანშია გადაღებული.
ცნობისთვის, საპროტესტო აქციები გასულ თვეს ირანის დედაქალაქ თეირანში დაიწყო, სადაც მოსახლეობა ეკონომიკურ პრობლემებსა და ეროვნული ვალუტის მკვეთრ გაუფასურებას აპროტესტებდა. დეკემბრის თვეში ირანის ვალუტა აშშ-ს დოლართან მიმართებით ისტორიულ მინიმუმამდე დაეცა, წლიურმა ინფლაციამ 42.2 პროცენტს მიაღწია. მოგვიანებით, პროტესტმა პოლიტიკური მოთხოვნებიც შეიძინა და რეჟიმის საწინააღმდეგო ლოზუნგებით გაგრძელდა. აშშ-ში დაფუძნებული ადამიანის უფლებათა დამცველი საინფორმაციო სააგენტო ირანის მასშტაბით 495 მომიტინგისა და 48 უსაფრთხოების თანამშრომლის გარდაცვალების შესახებ წერს. სააგენტოს ცნობით, ორკვირიანი არეულობის დროს 10 600 ადამიანი დააკავეს.
დემონსტრაციებს გამოეხმაურა აშშ-ის პრეზიდენტი დონალდ ტრამპი. მან განაცხადა, რომ თუ თეირანი „მოკლავს მშვიდობიან მომიტინგეებს“, ამერიკა „მათ დასახმარებლად მივა“. იმავე გზავნილი ტრამპმა, 8 იანვარს პირდაპირ ეთერში კიდევ ერთხელ გააჟღერა. მისი თქმით, ძალიან ძლიერად დაარტყამენ ირანს, თუ ხელისუფლება „ხალხის მკვლელობას დაიწყებს“.
